ALLERGIK OFTALMOPATOLOGIYALARDA OLOPATADIN GIDROXLORID 0.1% TARKIBLI KO’Z TOMCHISINI SAMARADORLIGINI BAHOLASH

Abstract

Butun jahon sog’liqni saqlash tashkiloti (BJSST) tomonidan oxirgi 10 yil davomida o’tkazilgan epidemiologik tadqiqotlar statistik xulosasi, allergik kasalliklar chastotasining global o'sishini qayd etdi [1,7]. Jahon allergiya tashkiloti (JAT)ning rasmiy bayonotiga ko’ra, hozirda umumiy allergozlar miqdori 3 barobar, xususan allergik oftalmopatologiyalar uchrashi 25% gacha ko’paygan [2,4]. Allergik ko'z kasalliklarining immunopatogenetik asosini gistamin (H) retseptorlari faollashishi va semiz hujayralarning degranulyatsiyasi tashkil qiladi [5,9,12]. Ushbu maqolaning asosiy maqsadi – oftalmologiya amaliyotida nisbatan yangi topikal antiallergik preparat - olopatadin gidroxlorid (Olopatadin 0.1% ko'z tomchisi) bo'yicha mavjud ilmiy adabiyotlarni ko'rib chiqish va tahlil qilish, shuningdek, klinik tadqiqot orqali Olopatadin 0.1% eritmasi preparatining samaradorligini baholash. Laboratoriya sharoitida allergik model sifatida tanlangan tadqiqot natijalariga ko’ra, quyonlarda maxsus allergenlar (masalan: gistamin allergik mediatori) yordamida chaqirilgan konyunktival allergik simptomlarning deyarli barchasi (konyunktiva giperemiyasi, ko'z yoshlanish, qovoqlarning shishishi, qizarish va ximozi) qisqa vaqt davomida bartaraf bo’lgan [1,3,6]. Hayvonlarda olib borilgan bu turdagi tadqiqotlarda olopatadin gidroxlorid eritmasi bir vaqtning o’zida ham antigistamin xususiyatga ham semiz hujayralarning membrana stabilizatori xususiyatiga ega ekanligi tasdiqlangan [8,10,11].